سارة من الكورة
بقلم حسين جمعة
ساره من الكورة
حكيتِك أشياء
ما حكيتا لحدا قبلك
مع إنّي ما بعرفِك
إلا من يومين
ما بعرف كيف وليش حكيتِك
يمكن لأنك دخلتِ الفكر حكيتِك
ومنك صابتني عين
ويمكن قلبي التقى مع قلبك
وبايدينا مسحنا دمعتين
من ظلم الزمان وكِبَر حزنك
من الضجر والقسوة والروتين
دمعة منّي ودمعة منك
صاروا بسمتين
ورسالة منّي ورسالة منك
وعالنت للواحدة والثنتين
آه…… ويا ويلي منك
… سرقتِني
لأ
انسرقنا الثنين
قالت: بدي اسمع صوتك
بلكي بفهمك
وبكون عنك كلمتين
اتصلت
وأميمة بتغنّي عصفور
دلقت قهوتك
طار العصفور
من جفلتك وقع علب الأسبرين
وكأنّه أوّل مرة يرنّ تليفونك
ليش خايف ومرتبك يا حسين
هيدي سارة من الكورة
بدها تسمعك
فات زمان احمرار الوجنتين
يا حسين
فيك طفل
لأ… طفل بعدك
الحب ما بيعرف عمر وسنين
آه منك يا حب ومن لوعتك
كبرتني
وصرت ابن ستة وتسعين
هيك بينتهي رقم تليفونها وتليفونك
وانقطع الإرسال
قبل ما نعرف نحنا مين
وشو بعيدة الكورة عن بعلبك
سهول وجبال
وسلسلة صنين
ما شفتها لسارة
وما التقت معك
يضرب الحب شو بيذل
يضرب الحب شو لعين
“نص وجداني – كُتب قبل زمن الفيسبوك”
حسين عبدالله جمعه
سعدنايل لبنان
2008
