ثقافة وفنون
ثمار الـحرب – بقلم علاء الدين بابكر
ثمار الـحرب
بقلم علاء الدين بابكر
والحرب القلنا بعيده زمان
هدي جات
ما دقّت باب وانتظرت
فتحت
مـَ استنّت مرحب
مـَ انتظرت بت تلبس توبا
وحبوبه تكمل تسبيحا
مـَ انتظرت نوبه
ويا نيل ..
الحرب ..
خلتنا بلا عنوان
مسحت أحزانّا
وكتبت أحزان تانيه
من نوع مـَ بخيب
بـِ يصيب ويخلي علاماتو
أحباب ماتو
وجيران فاتو
وأصحاب فـِ الغيب
ده كتاب الحرب
الكان مركون ومؤجل
فهرست الفقد
صفحات الموت
أيام
ما عرفنا .. صباح .. أو .. ليل
خلّينا الأزيار فاضيه
وخلّينا المصلايه عديمه
خلّينا ضيوف قالوا بجونا
وخلّينا رفوف فيها حكايات
وبواقي الشاي فـ الكبابات
وخلّينا صور تحكي شجونا
والرادي الشغال ام درمان
والمكوة المنتظرة التيار
والكورة مع الحارة القدام
إعلان الحفلة الـ .. فـِ النادي
وحساب البيت الـ .. فـِ الدكان
وصفوف الخبز ..
وخلّينا النيمة يتيمة ..
خلّينا الدار .. للجار .. بتنوح
ستّفنا نزوح ..
ما عرفنا .. قليل ؟ .. وللا كفايه ؟
وقعتْ فـِ السكة جروح
نبتت في شتّى الوجهات
.. .. .. .. .. .. .. .. ..
الحرب .. ثمارها حرام .
17 مايو 2023
