ثقافة وفنون
مطعونة -شعر محمد الحسن الشيخ
مطعونة
شعر محمد الحسن الشيخ
عشان أفواج عدوك تفنَى
ويموت كل الأحبة فِداك
تعالي براك
يا مطعونة في صدرك
ولسه ترضعي الطعنوك
يا معروضة في الأنقاض
وما استفسرتي ليه باعوك
وكيف باعوك
أنا مسامحك
معاي ناسي البعزُّوني
وبرضو حقيقة هم عزّوك
وناس تانيين بيعرفوا أيه علاقتي معاك
وأيه قدرك
ومقدار الأسى الجُوَّاك
أقعدي هناك
مع ذاتك
وراجعي القصة من أول
(من العنوان)
وجاوبيني
منو الفتَّح جراحاتك
ونادى ملايش الشيطان
منو القطَّع شرايينك
وبعثر خارطة السودان
ودسَّ الريشة في جيبو
عشان تتلخبط الألوان
منو الآذاك
منو الأخَّر زمن سعدك
وعمداً للجحيم ودَّاك
منو الفرَّق شَمِل أهلك
فرش درب الرجوع أشواك
منو الشوَّه ضفاف النيل
وغيَّر بالرصاص مجراك
منو الغسَّل يديك بالدم
كتب منشورو قال .. ينعاك
…….
…………
أقعدي هناك
مع ذاتك
يجيك وفد الغناوي غداً
يجمِّل صوت غناهو سماك
تعالي معاي
عشان نمشي المسافة الباقية نحنَ معاك ..
عشان ما إنتي فرحتنا
حننتظرك يشِع فوق الأعالي سناك
وعشان ما إنتي فرحتنا
وعشان ما نحنَ حبيناك
تعالي براك.
_____________
محمد حسن الشيخ
26 مايو 2023 م
