في ذكرى فض إعتصام القيادة.. بقلم:خالد ضياء الدين

بقلم:خالد ضياء الدين

مرة تانية وتالتة والف..في ذكرى فض إعتصام القيادة.. ولن نمل

اتخيل انك تكون نائم يقوم يضرب تلفونك هبايب الصباح وترد الو تقوم تسمع صوت ولدك بقول ليك(يا ابوي بقتلو فينا)

منو البقتل فيكم؟

الامن،الجيش والدعم،الجماعة ديل فضو الاعتصام.

طيب اخوانك وين؟

وينقطع الاتصال

إتخيل؟!!!

طلعت الشارع لقيت نفر هنا ونفر هناك وشوية اتلموا الشباب وبدأ التتريس وابدا مابنسى الشاب الكان بترس وببكي

وطلعن امات الولاد

طلعوا اخوان البنات والبلد حنضل والدنيا مقفلة والخوف بيتنطط من عيون الناس وكل واحد يقول ليك اولادي بهناك قالو الموت شديد يا الله سلم والبلد مقفلة وتلقى الشماته والفرحة بتنطط من عيون كيزان الحلة.

فجأة جات تاتشرات الدعم ورجع الامن القديم وكتائب حقدهم مرات تلبس دعم ومرات بوليس وبقينا نحلم مفتكرين الجيش براءة من هذه الجريمة لحدي مارجوا الولاد ورونا الحصل.

اليوم داك غادرت الاعتصام ومعاي الاساتذة احمدكمال وجكسا والطيب من ثوار امدرمان.غادرنا الاعتصام على امل العودة باكر لكن باكر كان يوم الغدر.وصدقوا الشباب الكانو بقولو لينا ونحن مغادرين الاعتصام(ماتمشوا تسيبونا كان رحتو بجازفونا)..

يا الله الصبر، يومين والوليدات لا حس خبر والرجعوا مليانين غباين وفي حالة صدمة وكانت الدنيا سحابة غم كبيرة والبوم عشعش في عتبات البيوت والوجع سكن الضلوع.

ثم بدو الوليدات يرجعوا..بدأ الوجع مالي عيونهم واجسادهم النحيلة بتحكي قصة زول امنتو نفسك وغدر بيك..زول كنت بتهتف ليه وكان بنوم معاك في الخيام بقاسمك الشاي البى جاي والطقة وبرقص معاك بالليل.

المشكلة اننا افتكرنا كل الجيش بي نكهة (الرهيفة التنقد) وكل الضباط حامد الجامد لكن لما خانونا الكلاب مالقينا جيش!

افتحوا البوابات ..مابنفتحا اطلعوا للموت الهوان الاغتصاب والدوس بالبوت وفصل البنات وعزلهن والنهب.

ورجعوا العيال معطونين وجع نازفين حد الجفاف كانوا بحلموا بي وطن يبنوه صاح ما كانو مفتكرين في حقد ممكن ينزرع في نفوس تستمتع بي صراخ البنات والاغتصاب معقولة زول مابعرفك يقتلك ويربطك بي طوبة ويرميك في النيل؟!

ومر اسبوع من رجعتم لا كلام لا اكل والموية جغمة كفاف والنوم خزاز والهلاويس والدمعة محبوسة بغصب..يا الله الدبارة.

خلاص يعني نقول الثورة انتهت والعسكر والفلول تاني استباحوا البلد وحلم الخلاص اصبح عدم؟

واتحولت العاصمة وكل الشوارع لي ثكنات..عساكر في الشوارع..رصاص وتاتشرات وكمية من الحقد *ومن هنا كانت بداية انفصال الاجهزة الامنية والنظامية من الشارع(هم السبب..هم القتلوا ونهبوا واغتصبوا هم الضربوا واعتقلوا وعذبونا ..كنا نحن الضحايا والما شاف في روحو شاف في جناهو والدنيا صبحت اضيق من خرم ابرة)*

وفي يوم جانا الجيش دخل البلد يستلم من الكتائب والغرائب احتلال المدن ولسة كان في امل وقالوا الجيش كرب والناس طلعت تلملم في الدموع تشتكي الوجع ومرات يصادفك ضابط بالدموع هو نفسو موجوع من الحصل وقلنا ليهم انتو الامل ..كنا مفتكرين الجيش كرب اتاريهو يا وجع الزمان ده كان دور مرسوم باتقان ونحن كنا جمهور بليد بصفق للخيانة على حساب البطل.

وفجأة من بين الرماد انتفض الحلم الحلف مايموت وكان دم الشهيد دافع كان الوجع دفة وليداتنا وظهرت دعوة مليونية يوم *30*

واتملت الشوارع بالشعارات واتشبكت كل اللجان احزاب تنسق وناشطين والثوار اخوان الشهداء شالو الليل سقد يعدو وينسقو لليوم المابتنسي .

وفي يوم مليح الطله اخضر زاهي باهي يشبهنا وبنشبهو بدت المواكب تنتشي و(من كل فج جوك) من هنا ومن هناك الاعمى شايل المكسر وزى بركان اشتعلت الشوارع ناس بتعرف بعض تبكي وتقالد وناس تحس انها من جديد اتولدت فيها الثورة واتملت الشوارع ناس وهتاف

وكان يوم *30* جبار للخواطر ورجوع للبدايات الصحيحة وانطلقنا..كان يوم رهيب مهيب نقلنا فيه جو الاعتصام للشوارع..الناس مطلعة خراطيش الموية بترش في الجموع وداك ولد صغير بوزع في ساندوتشات معطونة بي حب كبير،براميل الموية والتلج وديك تبكي وتقالد في رفاق ولدها الشهيد كان يوم عجيب تحلف تقول القيامة جات ونحن اصحاب اليمين وخسروا ناس ظنوا انو الموت بوقف احلام الشباب.بكت .. بكت..بكت الورود فرحة ملاقات الربيع نضر خدودها وزينها والامل فال العيال واصرار شديد(جيل عنيد)رافض يقعد في خانة العبيد مصر ينهي متوالية عسكر وحرامية

ده جيل موشح بالصمود جيل خلانا رغم الشيب والتجارب والسنين الفارقة بينا خلانا ننحاز ليه ونطلع في جداول مواكب الثورة ملتزمين بي مساراته..جيل علمنا ركوب الراس وطول النفس وشراب موية المطر…ده شعبنا المعلم.

ونجحنا..قلنا مليون ثائر في الشوارع طلعنا ملايين واهتز عرش الطغاة لمن ضاقت عليهم الارض بما رحبت.ولانه لسه كان وماتزال كتاب الموت بتعتاش على دم الشباب ولانهم مصرين يمسحو طعم الفرحة بى يوم *30* صبح الصباح لقينا جثامين ثوارنا مرمية وملفوفة بي علم السودان!

الخلاني اتذكر فض الاعتصام خلاني اتذكر رد الثوار في يوم 30 وكيف افتكر العساكر الإنقلبو انو السلاح بوقف احلام الشعب وكيف كان رد الشعب قوي ومن هنل ظهر الجيل العنيد في اطول ثورة ح يسطرها التأريخ ثورة كل يوم بتكسب لى صفوفها ثوار جدد لدرجة انها اصبحت ثقافة شعب مستحيل يتم تجاوزها..والكان بيفتكر انه عمر العشرينات ده بقدر يكسر ارادته بنقول ليه(كضبا كاضب)كدي اقدر على اطفالنا البقابلو رصاصك وقنابلك بي ايمان الصحابة.

#مواكب_ذكري #فض_اعتصام_القيادة

 صحيفة الهدف